Reviderejuvvon nationálabušeahtta:
Ráđđehus dieđiha ahte rievdadit ALIS-doarjaga
Ođas | Almmustahtton: 15.05.2025 | Dearvvašvuođa- ja fuolahusdepartemeanta
Dađistaga ožžot eambbo norgalaččat fástadoaktára ja eai leat goassege rekrutterejuvvon nu ollu fástadoaktárat go dál. Dán jagi lea juolluduvvon 560 miljovnna ruvnno doarjjaortnegii doaktáriidda, geat spesialiserejit dábálaš doavttirin. Reviderejuvvon nationálabušeahtas árvala ráđđehus lasihit juolludeami vel 27 miljovnna ruvnnuin, seammás go dieđihit ahte áigot rievdadit ortnega.
– Dálá ráđđehus lea nannen fástadoavtterortnega badjel milliárdda ruvnnuin. Golggotmánu 2021 rájes leat badjel 160 000 olbmo ožžon fástadoaktára. Leat rekrutterejuvvon eambbo fástadoaktárat ja doaktárat lohket iežaset loaktit barggus ja barget áinnas guhkit, dadjá dearvvašvuođa- ja fuolahusministar Jan Christian Vestre.
Doarjjaortnet doaktáriidda geat spesialiserejit dábálaš doavttirin (ALIS-doarjja) lea doaibmabidju mii lea veahkkin rekruttereme doaktáriid fástadoavtterortnegii.
ALIS-doarjja lea lasihuvvon máŋgga geardde dálá ráđđehusáigodagas, 102 miljovnnas jahkái 2021 gitta 565 miljovnna ruvnno jahkái 2025.
Seammás leat maid ALIS-doarjjaohcamat hirbmadit lassánan. Go galgá doalahit doarjaga siskkobealde vásttolaš bušeahttarámma, de oaniduvvo doarjjaohcanáigodat boahtte ohcanáigodaga daid ovddit áigodagaid ektui. Ráđđehus árvala reviderejuvvon nationálabušeahtas lasihit doarjaga 27 miljovnna ruvnnuin, ja nu lassána doarjja 592 miljovnna ruvdnui, mainna addá doarjaga miessemánu 2025 lohppii.
– ALIS-ortnet lea ja galgá ain leat geasuheaddji ortnet, ja mii vásihit dál buori ovdáneami dan dáfus. Seammás leat ortnega golut hirbmadit lassánan ja danne lea rievttamus rievdadit dan dál, dadjá Vestre.
Ráđđehus áigu ain joatkit ALIS-doarjjaortnegiin, ja rievdadit doarjjanjuolggadusaid mii gusto doarjjaáigodahkii, mii álgá geassemánu 2025. Rievdadusaid birra boahtá eambbo diehtu dakkáviđe go dat gárvanit.