Ny deponering av frøprøver i Svalbard Globale Frøkvelv

Frøprøvene inneheld frø av grønsaker og andre avlingar som er viktige for kulturell identitet, ernæring og motstandskraft mot klimaendringar.

Det største arkivet for avlingsmangfald kjem no til å huse frøprøver av kulturelle ikon som spenner seg frå koreansk perilla og adzuki-bønner til nederlandske kål- og spinatsortar og den gamle beninske kornsorten fonio.

– Denne veka kjem tusenvis a nye frøprøver til å bli sende og transporterte inn i dei frosne fjella på den kalde og karrige øygruppa Svalbard, som berre ligg 1360 kilometer sør for Nordpolen. Det er viktig for verda å innsjå kor stor verdi desse frøa har for å hjelpe forskarar, oppdrettarar og bønder med å førebu avlingsproduksjonen vår på naturlege og menneskeskapte utfordringar, seier statssekretær Hanne Berit Brekken i Landbruks- og matdepartementet.

Den 67. deponeringa kjem i tillegg til dei over 1,3 millionar frøsamlingane som allereie finst i frøkvelvet. Frøkvelvet ligg djupt inne i den arktiske permafrosten på Spitsbergen. Det er den norske regjeringa, NordGen og Crop Trust som forvaltar det.

Det er Landbruks- og matdepartementet som administrerer Det globale frøkvelvet på Svalbard. I tillegg har departementet ansvar for drift, tryggleik og stønad. Statsbygg har fått rolla som hovudrådgjevar når det gjeld bygg og vedlikehald av frøkvelvet.

• Du kan lesa meir om frøkvelvet på: Landbruks- og matdepartementet

NordGen er genbanken til dei nordiske landa, og er også kunnskapssenter for genetiske ressursar. Som driftaren av Frøkvelvet, har NordGen ansvaret med å handtera frøa inne i Frøkvelvet, kommunisera med andre genbankar og å halda ved like ein open, allmenn database med informasjon om frøprøvene som ligg lagra i Frøkvelvet.

• Les meir hjå NordGen: NordGen

Crop Trust er ein internasjonal organisasjon som arbeider med å konservera avlingsmangfaldet og såleis verna den globale mat- og ernæringstryggleiken. Kjernen i Crop Trust er eit gåvefond som garanterer økonomisk stønad til genbankar over heile verda på lang sikt. Crop Trust stør Det globale frøkvelvet på Svalbard og koordinerer storskalaprosjekt over heile verda for å sikra avlingsmangfaldet og gjera det tilgjengeleg for bruk. Crop Trust er anerkjent som eit essensielt element i finansieringsstrategien til den internasjonale traktaten om plantegenetiske ressursar for mat og landbruk.

• Les meir hjå Crop Trust: www.croptrust.org