Foreslår 7,5 millionar kroner for å redusere etterslep hjå Statsforvaltaren i Østfold, Buskerud, Oslo og Akershus

Nyheit | Dato: 15.05.2025 | Helse- og omsorgsdepartementet

Statsforvaltaren i Østfold, Buskerud, Oslo og Akershus har eit stort etterslep av ubehandla rettsakssaker på helseområdet. Regjeringa foreslår ei eingongsbevilging på 7,5 millionar kroner for å få behandla fleire saker og redusere etterslepet.

– Statsforvaltaren i Østfold, Buskerud, Oslo og Akershus hadde i haust over 2000 ubehandla klagesaker på helseområdet. Situasjonen hos Statsforvaltaren er alvorleg for innbyggjarane si rettstryggleik, og arbeidet med å finne ei løysing har hatt høg prioritet. Regjeringa foreslår ei ekstrabevilging i revidert nasjonalbudsjett til eit tidsavgrensa prosjekt for å få ned etterslepet. Prosjektet er forankra hjå Statens helsetilsyn, seier helse- og omsorgsminister Jan Christian Vestre.

Det pågår eit arbeid for å vurdere eit breitt sett av ulike tiltak for å avhjelpe statsforvaltarane sin ressurs-situasjon både på kortare og noko lengre sikt. Tiltaket regjeringa foreslår i revidert nasjonalbudsjett legg opp til eit tett samarbeid mellom Statens helsetilsyn og Statsforvaltaren i Østfold, Buskerud, Oslo og Akershus.

Klagar på rettigheiter

Pasient og brukar (eller ein representant for pasient/brukar) har etter pasient- og brukarrettigheitslova § 7-2 rett til å klage på helse- og omsorgstenester til statsforvaltaren dersom ein meiner ei rettigheit etter pasient- og brukarrettigheitslova ikkje er oppfylt, til dømes at ein ikkje har fått den hjelpa ein har krav på (ev. av riktig nivå, omfang, innan rimeleg tid mv.). Klagen skal sendast til den tenesta eller behandlaren som har fatta enkeltvedtaket eller avgjersla om behandling, slik at dei får ein moglegheit til eventuelt å omgjere avgjersla. Dersom tenesta eller behandlaren ikkje omgjer avgjersla si, blir klagen sendt vidare til statsforvaltaren for vurdering. Statsforvaltaren må behandle desse klagene, og Statsforvaltaren i Østfold, Buskerud, Oslo og Akershus har mange slike i restanse.

Anmodningar om tilsyn

Pasient, brukar (eller ein representant for pasient/brukar) og i nokre tilfelle nærmaste pårørande, har etter pasient- og brukarrettigheitslova § 7-4 rett til å oppmode statsforvaltaren om tilsyn, dvs. be statsforvaltaren om å vurdere å opne tilsynssak for å vurdere om tenesta/behandlaren har gjort pliktbrot/svikta i helsehjelpa. Dette kan vere aktuelt til dømes dersom pasienten/brukaren meiner han har fått feil diagnose/behandling/medisin/dose. Ei oppmodning om tilsyn kan sendast inn på eit skjema på statsforvaltaren sine nettsider.

Varsel/meldingar om alvorlege hendingar

Pasient, brukar eller nærmaste pårørande har etter mellom anna pasient- og brukarrettigheitslova § 7-6 rett til å varsle Statens helsetilsyn og Statens undersøkingskommisjon for helse- og omsorgstenesta (Ukom) om alvorlege hendingar, dvs. dødsfall eller svært alvorleg skade som tenesteytinga har skyld i og som er uventa ut frå pårekneleg risiko. I regjeringa sitt forslag til ny meldeordning skal meldingar om alvorlege hendingar sendast til statsforvaltaren i staden for Statens helsetilsyn. Slike varsel/meldingar kan sendast inn via helsenorge.no (og melde.no som omdirigerer innsendaren til helsenorge.no).