Foreslår 32 nye millionar til utprøving av kommunal nettlege

– Vår felles helseteneste skal vere den beste helseforsikringa. Derfor er eg glad for at vi no sikrar midlar til å prøve ut ordninga med nettlege i utvalde kommunar, slik at folk raskt og enkelt kan få digital konsultasjon med ein annan kommunal allmennlege når fastlegen ikkje er tilgjengeleg, seier helse- og omsorgsminister Jan Christian Vestre.

Meir tilgjengeleg teneste

Ordninga med ein kommunal nettlege inneber at kommunen organiserer eit digitalt allmennlegetilbod til befolkninga som eit supplement til legevakt og fastlegeteneste. Folk skal kunne velje digital konsultasjon med ein lege som kommunen har avtale med, dersom førespurnaden er eigna for digital handtering og den tilgjengelege timen du får tilbod om hjå fastlege ikkje passar for deg.

– Allmennlegetenesta er og skal fortsette å vere ein hjørnestein i vår felles helseteneste. Nettlegen vil bidra til at innbyggarane våre lettare får tilgang til allmennlegetenester, når dei treng det, for konsultasjonar som kan løysast utan fysisk undersøking. Det er dialog med fleire kommunar som er interesserte i å prøve ut ordninga med nettlege, og den nye økonomiske ramma gir rom for at fleire kommunar kan starte opp allereie i år, seier helse- og omsorgsministeren.

Regelverk på høyring

Det blir i første omgang sikta på å prøve ut ordninga med nettlege i inntil 20 kommunar.

Regjeringa vil kartlegge erfaringane frå desse kommunane, og basert på desse vurdere vidare utrulling. 

Regelverksendringane som krevst for at ordninga med nettlege skal kunne prøvast ut, blir sendt på ei tre vekers høyring 15. mai.